1. gr.

Sambandið nefnist Fjórðungssamband Vestfirðinga og starfssvæði þess er Vestfirðir allir að Brekkuá að vestan og austur um að Stikuhálsi milli Bitru og Hrútafjarðar.

 

2. gr.

Markmið sambandsins eru:

• að vinna að hagsmunum aðildarsveitarfélaga.
• að efla samvinnu sveitarfélaga og sveitarstjórnarmanna.
• að efla búsetu og atvinnulíf á Vestfjörðum.

Sambandið skal starfa í samvinnu við önnur landshlutasamtök sveitarfélaga, Samband íslenskra sveitarfélaga og samstarfsnefndir sveitarfélaga á Vestfjörðum auk annarra félaga og stofnana sem starfa á vestfirska vísu, eftir því sem við á.

 

3. gr.

Fjórðungsþing skal kallað saman árlega, eigi síðar en í september. 
Stjórn sambandsins boðar til þingsins með minnst fjögurra vikna fyrirvara og skal dagskrá send sveitarstjórnum eigi síðar en tíu dögum fyrir þingið. Þingið er lögmætt ef löglega er til þess boðað.

Aukaþing skulu haldin þegar stjórn sambandsins telur ástæðu til svo og þegar fjórðungur sveitarfélaga innan sambandsins óskar þess, enda sé fundarefnið tilgreint. 
Boðað skal til aukaþings með a.m.k. viku fyrirvara. 

4. gr.

Að afloknum sveitarstjórnarkosningum skulu sveitarstjórnir kjósa fulltrúa til tveggja ára, og aftur á miðju kjörtímabilinu. Sveitarstjórn er heimilt að kjósa jafnmarga fulltrúa og skipa sveitarstjórn hverju sinni og jafnmarga til vara til setu á Fjórðungsþingi. Atkvæðavægi hvers sveitarfélags ræðst af íbúatölu sveitarfélagsins þann 1. desember næstliðið ár, margfaldaðri með vogtölu sveitarfélagsins. Vogtala ákvarðast þannig:

Sveitarfélag með 200 íbúa eða færri	Vogtala 3.0
Sveitarfélag með 201-500 íbúa	Vogtala 2.0
Sveitarfélag með 501-1000 íbúa	Vogtala 1.5
Sveitarfélag með fleiri en 1000 íbúa	Vogtala 1.0

Heimilt er sveitarstjórn að framselja atkvæðisrétt sinn til eins eða fleiri þingfulltrúa. 
Sveitarstjórn skal senda Fjórðungssambandinu tilkynningu um kjör fulltrúa á Fjórðungsþing. 
Stjórn sambandsins er heimilt að bjóða til Fjórðungsþings aðilum, sem tengjast umfjöllun og starfi sambandsins, og hafi þeir málfrelsi og tillögurétt.

 

5. gr.

Á Fjórðungsþingi skal kjósa fimm menn í stjórn sambandsins og jafn marga til vara og skal kjörtímabil stjórnar vera tvö ár.  Kjörgengir til stjórnar eru aðal- og varafulltrúar í sveitarstjórnum á Vestfjörðum. Á þinginu skal kjósa tvo endurskoðendur og tvo til vara. 

Úr hópi kjörinna stjórnarmanna kýs Fjórðungsþing formann stjórnar, en að öðru leyti skiptir stjórnin með sér verkum. Stjórnarformaður, sem gegnt hefur formennsku í  fjögur ár samfleytt, er ekki kjörgengur til formannskjörs fyrr en að jafnlöngum tíma liðnum.    

Stjórnin skal undirbúa og hafa umsjón með Fjórðungsþingi. Milli þinga skal stjórn vinna að framkvæmd mála sem þingin ákveða hverju sinni eða lög frá Alþingi segja til um. Stjórn er heimilt að hafa frumkvæði að málum sem og að taka upp mál sem sveitarfélög innan sambandsins beina til hennar og varða hagsmuni vestfirskra sveitarfélaga.

 

6. gr.

Heimili og varnarþing sambandsins er á Ísafirði.

 

7. gr.

Reikningsár sambandsins er almanaksárið.

 

8. gr.

Fyrir Fjórðungsþing skal leggja endurskoðaða reikninga sambandsins fyrir síðastliðið ár og fjárhagsáætlun fyrir næsta ár. Þingið skal úrskurða reikninga, afgreiða endurskoðaða fjárhagsáætlun ársins og fjárhagsáætlun næsta árs og ákveða árstillag sveitarfélaganna til sambandsins, sem skal greitt með fjórum jöfnum afborgunum, 15. febrúar, 15. maí, 15. ágúst og 15. nóvember ár hvert.

 

9. gr.

Kostnaður við stjórn sambandsins, fundarhöld, ferðalög stjórnar og annar sameiginlegur kostnaður greiðist úr sameiginlegum sjóði. Þóknanir vegna stjórnarsetu skulu ákveðnar á Fjórðungsþingi. 

Hvert sveitarfélag greiðir ferðakostnað eigin fulltrúa.

 

10. gr.

Tillögur til breytinga á samþykktum þessum skulu sendar aðildarsveitarfélögum með dagskrá þingsins. Breyta má lögum þessum á Fjórðungsþingi og þarf 2/3 hluta gildra atkvæða til að breyting nái fram að ganga.

 

11. gr.

Kjósi sveitarfélag að hætta þátttöku í Fjórðungssambandinu, skal tilkynna það stjórn eigi síðar en sex mánuðum fyrir Fjórðungsþing og tekur úrsögnin gildi um næstu áramót á eftir. Á kosningaári skal úrsögn tilkynnast fyrir 1. júlí. Við úrsögn skal reikna út eignarhlut eða skuld sveitarfélags í samtökunum. Greiðsla til sveitarfélags, eða frá sveitarfélagi, skal vera í hlutfalli við íbúafjölda. Hætti sveitarfélag þátttöku í sambandinu þá skal jafnframt fara fram endurskoðun á samþykktum þessum.

 

12. gr.

Fjórðungssambandið verður ekki lagt niður nema tvö löglega boðuð Fjórðungsþing samþykki það með 2/3 hluta atkvæða. Þingin skulu haldin með a.m.k. þriggja mánaða millibili. Tillaga að slitum sambandsins skal fylgja fundarboði. Áður en seinni fundurinn er haldinn skal afstaða aðildarsveitarfélaga til slitanna liggja fyrir. Til þess að slit á sambandinu nái fram að ganga þurfa 2/3 hlutar sveitarstjórna aðildarsveitarfélaga að staðfesta þau.

 

13. gr. (bráðabrigðaákvæði)

 

Samþykktir þessar taka gildi að afloknu 55. Fjórðungsþingi Vestfirðinga 2010. 

Þannig samþykkt á 55. Fjórðungsþingi Vestfirðinga 2010.

1. gr.

Ársþingið heitir Fjórðungsþing Vestfirðinga.

 

2. gr.

Þingið er haldið samkvæmt lögum sambandsins.

 

3. gr.

Formaður stjórnar sambandsins, eða annar í umboði hans, setur þingið og gengst fyrir kosningu þingforseta. Lætur forseti því næst kjósa varaforseta og ritara, einn eða fleiri, og rita þeir eða láta rita í gerðabók gerðir þingsins og atkvæðagreiðslur og skal bókun lesin upp í þinglok, sé þess óskað.  Heimilt er að færa þinggerð í tölvu.  Heimilt er þingforsetum að ráða utanþingsskrifara til aðstoðar ritara. Heimilt er að senda út og hljóðrita ræður þeirra sem til máls taka á þingfundum.

 

4. gr.

Kjörbréf fulltrúa skulu lögð fyrir þingið í upphafi þess, undirrituð af hlutaðeigandi sveitarstjórn, eða framkvæmdastjóra hennar. Þingfundur kýs þriggja manna kjörbréfanefnd til að athuga kjörbréf fulltrúa í upphafi þings og leggur hún niðurstöður sínar fyrir fundinn til samþykktar eða synjunar.

 

5. gr.

Fulltrúar skulu tilkynna þingforseta skriflega málefni þau er þeir óska að komi til umræðu og sé jafnframt getið flutningsmanna. Þingforsetar ráða röð málanna á dagskránni.

 

6. gr.

Í upphafi þings skal kjósa eftirtaldar fastar nefndir: Fjórðungsmálanefnd, fjármálanefnd og allsherjarnefnd. Málum skal, eftir eðli þeirra, vísað til þeirra nefnda en kjósa má fleiri nefndir ef þurfa þykir. Rísi ágreiningur um til hverrar nefndar skuli vísað sker þingfundur úr. Á þingum, þegar stjórnarkjör fer fram, skal þingið kjósa fimm manna kjörnefnd sem gera skal tillögur að skipan stjórnar, varastjórnar, aðal- og vara- endurskoðenda.  Á dagskrá má taka mál, sem síðar koma, ef þingfundur leyfir.

 

7. gr.

Meirihluti greiddra atkvæða ræður úrslitum á fundum. Mál er fallið ef atkvæði eru jöfn.

 

8. gr.

Tvær umræður skulu fara fram um hvert mál, þó er heimilt að víkja frá þessari reglu ef fundurinn samþykkir.  Við lok fyrri umræðu skal málum vísað til nefnda. Eftir umfjöllun nefnda skal mál tekið til annarrar umræðu og afgreiðslu þings.

 

9. gr.

Hver þingfulltrúi hefur leyfi til að koma með breytingar- eða viðaukatillögur, bæði við aðaltillögur og breytingartillögur. Breytingartillögur hafa forgangsrétt við atkvæðagreiðslur. Allar tillögur skal afhenda forseta skriflega, undirritaðar af tillögumanni, áður en til atkvæða er gengið.

 

10. gr.

Máli má víkja frá umræðu með rökstuddri dagskrá og skal hún borin undir atkvæði þingfundar.

 

11. gr.

Atkvæðagreiðsla fari fram með nafnakalli, ef þess er krafist, eða ef hún er óljós að dómi forseta. Sé óskað skriflegrar atkvæðagreiðslu, skal hún fara fram og skal stjórnin hafa tiltæka atkvæðaseðla miðað við atkvæði hvers þingfulltrúa.

 

12. gr.

Þegar forseti vill taka þátt í umræðum víkur hann sæti en varaforseti gegnir þá forsetastörfum.

 

13. gr.

Fulltrúar skulu taka til máls standandi frá sætum sínum eða í ræðustól og snúa máli sínu til forseta, sem sjá skal um, að fulltrúar taki til máls í réttri röð, eftir því sem þeir hafa kvatt sér hljóðs. Enginn fulltrúi má í ræðu sinni lesa upp prentað mál, nema með leyfi forseta.

 

14. gr.

Enginn fulltrúi má taka oftar til máls en þrisvar sinnum við sömu umræðu í hverju máli, en þó skulu flutningsmenn máls og framsögumenn meiri- og minnihluta nefnda hafa rétt til að taka oftar til máls.

 

15. gr.

Forseta skal skylt að bera undir atkvæði hvort umræðum skuli hætt, ef fimm fulltrúar æskja þess skriflega.

 

16. gr.

Forseti sér um að góð regla sé á fundum og hefur rétt til að víta framkomu fulltrúanna í orðum og hátterni.  Sé fulltrúi mjög ókurteis í orðum hefur forseti leyfi til að taka af honum orðið við þá umræðu.  Skyldir skulu fulltrúarnir til að aðstoða forseta í að halda góðri reglu.

 

17. gr.

Þingfundir skulu öllum opnir á meðan húsrúm leyfir án málfrelsis og tillöguréttar. Heimilt er að halda lokaðan þingfund ef meirihluti þingfulltrúa samþykkir.

 

18. gr.

Þingsköpum þessum má breyta og þarf 2/3 hluta gildra atkvæða til að breytingin nái fram að ganga.

 

Þannig samþykkt á 55. Fjórðungsþingi Vestfirðinga 2010.