Verkefninu í heild sinni má skipta í þrennt:

Forverkefni

Vinnu við forverkefni lauk í desember 2009. Þessi hluti var fjármagnaður er af Vaxtarsamningi  Vestfjarða og mótframlagi samstarfsaðila. Undirbúningur svæðisskipulagsvinnu fyrir Vestfirði nýttist einnig í þessum hluta.  Í forverkefninu fólst einkum skráning á núverandi nýtingu á strandsvæðum Vestfjarða og kynning á verkefninu fyrir stjórnvöldum, almenningi og öðrum hagsmunaaðilum. Niðurstöður þessa fyrsta áfanga eru og verða nýttar til að undirbyggja og útfæra annan og þriðja áfanga verkefnisins, þ.e. aðalverkefni og framhaldsverkefni.

Aðalverkefni

Annar áfangi áætlunarinnar miðar að því að gera hina eiginlegu stefnumörkun nýtingaráætlunarinnar. Fyrst verður gerð nýtingaráætlun fyrir Arnarfjörð og í framhaldinu verður gerð sambærileg áætlun fyrir alla Vestfirði, með sama hætti og í samræmi við þær niðurstöður sem fást úr áætlanagerð fyrir Arnarfjörð. Sérstök áhersla verður lögð á aðkomu hagsmunaaðila í vinnunni og samvinnu við opinbera aðila. Áætlað er að vinna við nýtingaráætlun Arnarfjarðar taki um 16 mánuði en að lokið verði við gerð nýtingaráætlunar fyrir alla Vestfirði á um tveimur árum.

Framhaldsverkefni

Í þriðja áfanga verkefnisins verður gerð greining á því hvernig nýtingaráætlunin fellur að núverandi stjórnsýslu og hvernig má hrinda henni í framkvæmd, þ.e. þannig að sveitarfélög komi að skipulagi á skilgreindum strandsvæðum.  Skoðaðir verða möguleikar á gerð lögformlegs strandsvæðaskipulags og leiðbeiningagerðar fyrir leyfisveitendur, skipulagsyfirvöld og notendur svæðanna. Áætlað er að vinna við framhaldsverkefni geti tekið 1,5-2 ár.

Verkáætlun: Nýtingaráætlun fyrir strandsvæði Arnarfjarðar